Грда е глетката на езерцата и каналите во Градски парк за граѓаните што во овие пролетни денови шетаат или се рекреираат низ него. По нив пловат отпадоци, лисја, водата е заматена и нечиста. Сепак, надлежните не планираат наскоро да ги чистат каналите и езерата во паркот, затоа што како што велат, било рано, комплетно се чистеле на четири-пет години.

Градскиот парк е единствениот голем зелен простор во централното градско подрачје, па затоа е веројатно и најпосетуван од скопјани, особено преку викенд. Но, граѓаните реагираат дека освен зеленилото, потребно е да се одржуваат и водните површини.

Речиси секое попладне кога е времето убаво со децата сме во парк, преку викенд задолжително. Навистина е убаво, зелено, средено, одмор за очите, но жал ми е што така како што се одржува зеленилото, не се одржуваат и езерцата. Тие се вистинско богатство во паркот, но навистина се нечисти. Знам дека за тоа во голема мерка се виновни и некои неодговорни граѓани кои не внимаваат каде фрлаат отпадоци, но сепак треба да се исчистат и тоа што побрзо додека состојбата не се влошила – реагира Марија, која живее во близина на Градски парк и секое слободно време со семејството го поминуваво него.

Од ЈП „Паркови и зеленило“ велат дека чистењето на езерцата и каналите е во надлежност на Градот Скопје, а оттаму не одговараат дали годинава планираат да се ангажираат околу водните површини во паркот.

Последното извршено чистење било спроведено во 2019 година, за која акција биле потрошени повеќе од 8 милиони денари, за што своевремено имало реакции од експерти и здруженија на граѓани за заштита на животните за начинот на кој постапката била спроведувана. Езерцата се со површина од над 40.000 м2, а постапката за нивно рачно или машинско чистење со цел заштита на животинскиот свет и флората, се спроведува на секои четири до пет години -објаснуваат од претпријатието.

Оттаму тврдат дека стручни лица од Секторот за комунални работи на Град Скопје веќе извршиле надзор на езерцата и дека ја следат состојбата, па доколку е потребно во точно определен период во годината, по налог на Градот, ЈП „Паркови и зеленило“ или друго градско претпријатие може да изврши површинско чистење на езерските води.

Езерцата и каналите во Градски парк комплетно беа исчистени во 2019 година, откако претходно, како што информираа тогаш од Град Скопје, цели десет години биле сосема „заборавени. Езерата тогаш беа испразнети и рачно и машински се чистеа насобраните лисја, тињата, наносите од земја и отпадоците, за потоа повторно да се наполнат со вода.

Следната, 2020 година, екипите на „Паркови и зеленило“ спроведоа акција за чистење на езерцата во вториот дел на Градскиот парк, кога рачно се вадеше насобраниот отпад, кеси и пластични шишиња и гранки од водата.

Дали е дојдено време повторно да се чисти треба да проценат Градските власти. А посетителите, кои уживаат во прошетките низ паркот, треба да се грижат и за неговата хигиена – да ги собираат по себе отпадоците, лименките и пластичните шишиња, кои многу често, за жал, завршуваат во тревата или во езерцата.