Претседателката на Европската Комисија, Урсула фон дер Лајен и претседателот на Европскиот Совет, Шарл Мишел изразија несогласување со одлуката на американската администрација да ги забрани летовите кон и од земјите на ЕУ во наредните триесет дена поради коронавирусот.

-Коронавирусот е глобална криза, не е лимитиран на еден континент и бара соработка наместо еднострано делување. ЕУ не се согласува со фактот што САД одлучи да забрани патувања без консултации, кусо соопштија кабинетите на фон дер Лајен и Мишел.

Во нивната реакција се додава и дека Европа ги презема сите потребни мерки да се спречи ширењето на вирусот Ковид-19, за да се лимитира број на заразени, а се дава и поддршка за истражувачи кои ќе бараат начин за излез од ситуацијата.

Трамп одлучи да воведе забрана за прифаќање туристи од Европа, но не и од Велика Британија која веќе не е дел од блокот и во наредните 30 дена почнувајќи од петок на полноќ ги затвора границите на сите летови од 26 земји од шенген зоната.