Европската комисија сака земјите-членки да ја засилат контролата на надворешните граници и да ја интензивираат полициската соработка со цел подобро да се заштити Европска Унија од екстремистички напади.

ЕК денеска ја презентираше својата Агенда за борба против тероризмот, во која се наведува дека пресудно за безбедноста на европските граѓани е ефикасното откривање на осомничените на границите на ЕУ.

Во ЕУ во 2019 година извршени се седум џихадистички терористички напади, а осуетени се двојно повеќе напади.

– Земјите-членки треба итно да ја завршат модернизацијата за управување со надворешните граници во рамките на договорената патна карта, со амбиција да развиваат најмодерен систем на управување со границите во светот, истакна ЕК.

Според прописите на Шенгенскиот информативен систем, што се применуваат од пред две години, од националните власти се бара да креираат предупредување за терористичките престапи, а земјите-членки мора да ги поделат информациите со Европол.

ЕК исто така планира да соработува со земјите-членки на подобрување на пристапот до дигиталните докази и шифрирани информации што ги користат криминалците.

Според проценките на ЕК околу 5.000 жители на ЕУ отпатувале во Сирија и во Ирак и им се придружиле на џихадистите. Околу 1.500 се уште се таму и би можеле да се вратат и да „нападнат” европски цели. Поради тоа ЕК апелира земјите-членки на ЕУ да обезбедат интероперабилност на своите информатички системи, размена на разузнавачките податоци за странските борци и да извршат ефикасни, системски проверки.