Јужнокорејскиот актер О Јеонг-су (79), најпознат по улогата во серијата „Игри на лигни“, е прогласен за виновен за сексуално вознемирување, пишува „Дејли мејл“.

Имено, судот го прогласи за виновен за „непримерно допирање жени“ кое се случило во 2017 година. Актерот е осуден на осум месеци затвор, условно на две години. Исто така, му е наредено да присуствува на 40 часа предавања за сексуално насилство.

Судот утврди дека извештајот на жртвата за нападот и нејзините тврдења се конзистентни и рече дека таквите „изјави не можат да се дадат без вистински да се доживее нападот“.

При напуштањето на судот, актерот им кажа на новинарите дека планира да ја обжали одлуката. Има седум дена да поднесе жалба или пресудата ќе биде потврдена.

Да потсетиме, актерот претходно ги негираше обвинувањата.

„Јас само ја држев за рака додека одевме околу езерото. Се извинив затоа што рекоа дека нема да прават врева околу тоа, но тоа не значи дека ги признавам обвинувањата“, изјави О Јеонг-су за корејска телевизија.

Според корејските медиуми, по обвинението сите материјали со актерот биле отстранети од каналот Јутјуб и официјалните веб-страници на јужнокорејската влада. Обвинението влијаеше на неговата кариера, што доведе до негово исклучување од втората сезона на „Игра на лигни“ и други проекти.

ВИДЕО | Објавен е првиот тизер за втората сезона на „Squid Game“ и детали од претстојната сезона