Светската здравствена организација (СЗО) истакнува дека недостатокот на јод загрозува околу две милијарди луѓе во светот и е главната причина за појава на ментални нарушувања. Недостатокот на јод ја намалува интелигенцијата за 10-15 отсто. Од друга страна, 700 милиони луѓе во светот страдаат од гушавост.

Јодот е суштински минерал за одржување на добро здравје. Како основен градежен елемент на хормоните на тироидната жлезда, тој влијае на повеќето метаболички процеси во телото и е неопходен за нормален раст и развој на сите клетки и ткива.

Недостатокот на јод може да влијае на:

– гушавост, односно зголемување на тироидната жлезда

– неочекувано зголемување на телесната тежина – ниското ниво на јод може да го забави метаболизмот, храната се складира како маснотии, а не согорува како енергија

– замор и слабост – последица на неактивноста на тироидната жлезда може да биде драстичен пад на енергијата, без оглед на соодветна количина на сон

– проблеми со учењето и меморијата

– губење на косата и сува кожа

– зголемена чувствителност на студ

– лошо расположение – недостатокот на јод го зголемува ризикот од хипотироидизам. Работата на тироидната жлезда е тесно поврзана со расположението, така што хипотиреозата може да предизвика симптоми слични на оние на депресија

– обилна или нередовна менструација

Еден од пионерите во лекувањето на болестите на тироидната жлезда со јод е д-р Дејвид Браунштајн, автор на книгата „Јод: Зошто ти треба, зошто не можеш да живееш без него“ (Iodine: Why You Need It, Why You Can’t Live Without It), кој истакнува дека сите жлезди во организмот зависат од адекватното ниво на јодот за оптимално функционирање. Недостатокот на јод доведува до нерамнотежа на ендокриниот систем. Невозможно е да имате избалансирани хормони без соодветна количина на јод.

Најдобри извори на јод се морските риби и алгите.