Државата да склучи слободна трговија и со државите од Северна Африка и бившиот СССР
Можностите за извоз се исцрпени и мора да се бараат нови земји каде би ги пласирале нашите производи според квалитетот и цената, рече Бранко Азески, претседател на СКСМ на седницата на Националниот совет за извоз
Државите од Северна Африка и од поранешната СССР, ги таргетирала Стопанската комора на Македонија, како приритетни и со кои државата би требало да се насочи за да склучи Договори за слободна трговија, за да се диверзифицира и зголеми извозот. Причината е проста, вели Бранко Азески, претседател на СКСМ – во моментот 70 до 80 отсто од македонскиот извоз оди кон ЕУ, а 70 до 70 отсто од него е насочен кон само една земја – Германија.
-Можностите за извоз се исцрпени и мора да се бараат нови земји каде би ги пласирале нашите производи според квалитетот и цената – рече Азески на седницата на Националниот совет за извоз. Во рамките на проектот со УСАИД ќе се формира и Институт за извоз, кој ќе помогне во натамошното образование на специјализирани кадри и менаџери, кои му се преку потребни на домашното стопанство.
Азески смета дека на сите партии кои ќе учествуваат на претстојните избори, економијата и интензивирањето на извозот, треба да им бидат приоритет. Тој повтори дека на бизнисот му треба владеење на прфавото, намалување на корупцијата и по којзнае кој пат побара да се дефинираат трошоците за извозните компании преку елиминирање на парафискалните давачки.
-За ова дискутираме со децении и нема никакво подобрување иако пред секои избори се ветува дека ќе се реши овој проблем со непотребните и двојните трошоци кои ги плаќаат компаниите. Ќе бараме и директна поддршка на извозниците и контрола на субвенциите, како и поголемо внимание за земјоделството и туризмот“, рече Азески.