Летниот бран на зголемен број на ковид-позитивни случаи во земјава се должи на микс на подваријанти на омикрон сојот кој е присутен во голем број од инфекциите. Тој, практично, сосема ја заобиколува одбраната стекната од прележувањето на досегашните соеви, но и од вакцинацијата, па сосема очекувано во периодот што следи да се шири експресно за што сме сведоци деновиве, токму од зголемениот број на нови инфекции меѓу граѓаните.

Со овие зборови д-р Илчо Ефкоски специјалист по трудова медицина за „Слободен печат“  ја согледува моменталната епидемиолошка слика во земјава по порастот на бројките во дневната статистика на заболени од ковид -19 од Министерството за здравство.

Д-р Ефкоски посочува дека колективниот имунитет за кој многу се зборуваше не е нешто што би требало да се ослониме за заштита од новиот сој БА.5

– Она што денеска го гледаме преку зголемениот број на инфекции е резултат на мешањето на многуте видови од ковид соеви со доаѓањето на иселениците во земјава, заминувањето на одмор на граѓаните и масовните собири кои според мене се дел од причините за големиот број на новоинфицирани во земјава – посочува д-р Ефкоски.

Според него, пикот на летниот ковид бран се очекува да биде за две до три недели од сега, а до тогаш тој апелира до надлежните да се почитуваат обврските по Законот за безбедност и здравје при работа во служба за заштита на работниците, како и да се создадат безбедни затворени простории за свадби, прослави, дружење на луѓето, преку финансиска помош на фирмите за воведување на вентилација и филтрација на воздухот во затворените простории.

– Најдобро избегнување на инфекцијата е да се избегнуваат собири и комуникација во затворен простор. Носењето на маската КН-95 е докажана превентива од вирусот во затворените простории во кои има лица кои не се од вашиот дом. Понатаму задолжителна вакцинација за сите лица над 50 години кои се вакцинирани пред 6 или повеќе месеци е неопходна. Истовремено се докажа дека вакцините примени во 6 месеци наназад време, сепак штитат и до 37% од заразување, нешто кое би ни помогна и за да имаме помалку хоспитализации – посочува д-р Ефкоски.

Специјалистот по трудова медицина д-р Ефкоски во исто време апелира до надлежните навремено да размислуваат на мерките за заштита во пресрет на училишната година кога според него, лани направи бум со нови инфекции во државата.