Четири деца починаа од труење во домашни услови во рускиот град Краснојарск, пренесува Ало.

Бремената мајка, таткото и четирите деца на возраст од 6, 11, 12 и 13 години утрото на 21 септември отишле на лекар жалејќи се на гадење и повраќање. Се работи за семејство кое има фарма. Се испоставило дека претходниот ден вечерале кнедли и пилешко купени во продавница, приготвени дома. Целото семејство веднаш било хоспитализирано. Набрзо здравствената состојба на шестгодишното девојче и тринаесетгодишното момче нагло се влошила и тие починале во болница. Останатите биле пренесени со хеликоптер на Брза помош во клиника во Краснојарск. И покрај напорите на лекарите, починале уште две деца – девојчиња на возраст од 11 и 12 години. Состојбата на родителите се оценува како стабилна и тие се свесни.

Според полицијата, смртта кај децата настанала од токсичен ефект на неидентификувана супстанција. Во кујната во која живеело семејството биле пронајдени хемикалии, антибиотици за животни и непознати материи.

– Од семејниот стан зедовме храна, светло обоена материја во неозначена кеса што ја најдовме во шкафот во кујната, како и антибиотик за говеда што се чуваше во фрижидер. Со оглед на лошата состојба во станот, обвинителството ќе ја проверува работата на социјалните служби. – изјавија од истражниот комитет.

Според сведочењето на родителите, на денот на труењето куќата била третирана со инсектицидот дихлорвос, а децата во тоа време шетале надвор. Откако се вратиле мајката почнала да подготвува вечера. Жената рекла дека не додавала штетни материи во храната.

– Истрагата оди во три насоки, труење со храна од семејството, изложеност на опасна по живот супстанција во готвената храна и труење со хемикалии од домашните занаети – велат надлежните.