Потрошувачката кошничка во Бугарија е за околу 30 отсто поевтина од просекот за ЕУ. Бугарите, Полјаците и Романците купуваат најевтина храна, рече Николај Валков, претседател на Здружението за модерна трговија, во кое членуваат хипермаркетите, објави „Сегабгњус“.

Тој посочи дека една од причините зошто некои стоки чинат поевтино во други земји е тоа што таму се применува помал ДДВ за храната.

„Секогаш ќе има поединечни стоки кои во одреден момент во различни земји може да се најдат по пониски цени. Тоа не значи дека потрошувачката кошничка кај нас е поскапа“, коментира Валков.

Според него, има и други ценовни фактори – на пример, ако италијанското сирење „Грана Падано“ во Бугарија е поскапо отколку за богатите Швајцарци, тоа може да се должи на фактот што Швајцарија е во непосредна близина на земјата производител.

Експертот посочи дека инфлацијата во Бугарија е целосно споредлива со онаа во Чешка, Словачка, Романија и Полска. „Во Бугарија лани инфлацијата на храната беше 25 отсто, а во Германија 20 отсто“, истакна Валков.