Брисел: Зошто Русија нуди милиони вакцини, а земјата не напредува во вакцинација
Руската вакцина Спутник V, според првите луѓе на Европската комисија, не е одобрена на европскиот пазар од повеќе причини. Претседателката на Европската комисија, Урсула фон дер Лајен, рече дека Русија сѐ уште воопшто не побарала авторизација за комерцијализација при Европската агенција за лекови (ЕМА) и додаде дека за да аплицира, Русија треба и да ги поднесе сите потребни документи како што е случај за сите останати фармацевтски компании, јави МИА.
„Ние мораме да имаме пристап до местото на производство за инспекција, како што видовме е важно е да има стабилно и високо квалитетно производство, затоа е потребна инспекција на местото на производство. Сѐ уште се прашуваме зошто Русија нуди милиони дози на други земји, но не напредува со вакцинацијата на сопственото население“, порача фон дер Лајен.
Русија засега побарала само научно мислење од европските власти, но не и дозвола за комерцијализација.
Запрашана за одлуката на Унгарија да ги одобри руската и кинеската вакцина иако тие не се дозволени на пазарот на ЕУ, еврокомесарката за здравство Стела Кириакидес порача дека секоја земја може да носи суверени одлуки, но дека треба да биде запознаена со одредени аспекти.
„Земјите членки имаат право да склучуваат договори со Русија и Кина на сопствена одговорност, но важноста на дозволата за комерцијализација значи дека постои процес на фармаковигиланца, тоа значи дека кога вакцината поминува низ процес на авторизација, ЕМА и индустријата ги следат сите случаи на нус ефекти. Секоја земја членка која употребува вакцини што не се авторизирани од страна на ЕМА ја нема оваа фармаковигиланца“, рече Кириакидес.
Минатата недела ЕМА излезе со изјава дека не може да ги најде документите кои ги поднела Русија за одобрување на Спутник V, а производителот на вакцини на својот твитер профили го објави барањето упатено до ЕМА: