Еден армиски, еден полициски хеликоптер и ЕР-трактор утре уште во раните утрински часови ќе интервенираат од воздух врз шумата која гори меѓу беровските села Будинарци и Митрашинци, вели за МИА директорот на ЦУК, Стојанче Ангелов.

Доцна попладнево армискиот хеликоптер направил само извиднички лет, од кој се добиени координатите и планот за утрешното гаснење на пожарот од воздух.

Ангелов вели дека се собираат и теренски возила кои можат да носат и поголеми количини на вода, со цел да се делува истовремено и од земја.

Градоначалникот на Општина Берово Звонко Пекевски побарал и од соседните општини да се вклучат во гаснењето на овој голем шумски пожар, кој е во непристапен планински предел.

Пекевски вели дека вечерва има дежурни екипи кои ќе внимаваат на неколку објекти – бачила со стока во овој планински предел.

Огнените јазици се на далечина од шест километри од регионалниот пат Берово – Виница и засега нема опасност по населените места во регион.

Според информациите од пожарникарите, зафатена е шума од над 50 хектари, а пожарот брзо се шири поради ветерот. Огнените јазици не се ставени под контрола, а исто така го гасењето на пожарот е вклучено и месното население по повикот за негова мобилизација од страна на градоначалникот Пекевски.

Драматично е во беровско – пожарот е вон контрола, градоначалникот бара помош, испратен е хеликоптер на АРМ