Борба против метежот: Сингапурци плаќаат по 100.000 евра само за право да купат возило
Цената на десетгодишната лиценца за поседување автомобил во Сингапур е покачена на 146.002 сингапурски долари (101.303 евра), со цел да се намали сообраќајниот метеж во малата држава. Без ваква лиценца, граѓаните не можат ни да купат автомобили, чија цена веројатно и онака е меѓу највисоките во светот поради високиот данок. Ако во цената се вклучи и лиценцата, ист модел на автомобил во Сингапур е шест пати поскап отколку во САД.
Лиценците за поседување возила се воведени во 1990 година, кога се засилиле сообраќајните метежи. Тие мора да бидат обновени на десет години, при што корисниците се определуваат и за категорија – поевтини се лиценците за помали возила, мотоцикли и комерцијални возила, а поскапи за лимузини и џипови. Најевтината е 104.000 долари (72.153 евра), а најскапата „отворена“ лиценца, која ги опфаќа сите возила, чини 152.000 сингапурски долари.
Сингапур е земја со 5,9 милиони жители и најголема концентрација на милијардери во светот, но годишната просечна плата е околу 70.000 долари, (4.000 евра месечно), што значи дека е тешко да се издвојат средства за возило. На почетокот на оваа година на улиците имало 1 милион приватни возила.
Властите настојуваат да ги поттикнат граѓаните да го користат системот за јавен транспорт, кој исто така е меѓу најефикасните во светот. Само во изминатата година владата издвоила 60 милијарди долари за обнова и проширување на железницата.