Бојан Јовановски, првоосомничениот во предметот „Рекет“ е хоспитализиран во ГОБ „8-ми Септември“ од 26.11.2019 до денес петок 29.11.2019, со упат кој го издал доктор во ординацијата во КПВ „Шуто Оризари“, соопштуваат од градската болница.

-Сместен е во апартман во одделението за интензивна нега, заради почитување на безбедносните протоколи, а не заради тежината на неговата здраствена состојба – е наведено во соопштението од Градската болница „8-ми Септември“.

Оттаму, појаснуваат дека Бојан Јовановски во моментот е во добра општа состојба и здраствена кондиција, а во установата ќе остане се додека не се комплетираат резултатите од спроведените испитувања.

Истиот, велат од болницата, планираат да биде испуштен најдоцна во понеделник (02.12.19) година.

Бојан Јовановски – Боки 13 на 15 јули годинава беше приведен на распит во Обвинителството, оттогаш е во притвор а неговиот адвокат, Сашо Дуковски, постојано во медиумите вели дека во затворот има нечовечки третман и тортура врз обвинетиот Бојан Јовановски.