Во полициската станица Битола денеска бил извршен службен разговор со двајцата битолчани А.С. и Р.С. на возраст од 42 и 41 година, од кои едниот е осомничен дека, објавувајќи фотографија со оружје на социјалните мрежи, му се заканувал на висок функционер, чие име полицијата не го открива.

„А.С. се сомничи дека извршил кривично дело по 144 од Кривичниот законик, односно на социјална мрежа објавил слика со оружје и упатил закана кон висок функционер. Во разговорот, тој го признал делото и изјавил дека оружјето е на Р.С. Во полициска станица, од Р.С. биле одземени една ловечка пушка, ловечки карабин и дозвола за оружје“, се наведува во полициското соопштение.

Со настанот бил запознаен јавен обвинител. По целосно документирање на случаите, против лицата ќе бидат поднесени соодветни пријави, додаваат од МВР.