САД да останат „силен и лојален“ сојузник на останатите земји од Алијансата без оглед на тоа кој ќе победи на претседателските избори во таму во ноември – ова се очекувањата на генералниот секретар на НАТО, Јенс Столтенберг.

Поранешниот американски претседател Доналд Трамп, сега претендент за претседателската номинација на Републиканската партија за есенските избори, одржа говор на почетокот на февруари на предизборен митинг во државата Јужна Каролина што предизвика загриженост кај голем број земји-членки на НАТО поради можноста тој да се врати во Белата куќа, пишува МИА.

Трамп тогаш рече дека како претседател на САД, му кажал на шефот на држава на земја на НАТО која не сакала да ги зголеми трошоците за национална одбрана дека во таков случај не само што нема да ја брани земјата за која станува збор според договорот на Алијансата во случај на напад од Русија, но и би го „охрабрил“ рускиот претседател Владимир Путин „да прави што сака“.

Главен ривал на Трамп на ноемвриските избори е актуелниот американски претседател, демократот Џо Бајден.