Оваа недела најдобрата македонска женска ракометна репрезентација има шанса да обезбеди пласман на Европското првенство кое ќе се одржи годинава од 28 ноември до 15 декември во Австрија, Унгарија и Швајцарија.

Нашите најдобри ракометарки по четири кола во квалификациската група „5“ се наоѓаат на второто место со четири бодови, водечка е Шпанија со осум кола и веќе е сигурен учесник на континенталниот шампионат. На третата позиција е Литванија со два бодови, колку што има и четвртопласиран Азербејџан.

Двете победи ги остваривме во старните две кола, најпрвин во Скопје со 40:17 го совладавме Азербејџан, а потоа на гости остваривме важен триумф над Литванија со 31:28.

Нашата селекција на едно коло до крајот може и официјално да слави пласман на ЕП. Тоа може да се случи в среда (3 април) доколку Шпанија слави во Вилнус против Литванките, а Македонија дојде до победа или ремизира во Баку против Азербејџан.

Во последното шесто коло на 7 април Шпанија е домаќин на Азербејџан, а Македонија ќе ја пречека Литванија.

Од Ракометната федерација на Македонија (РФМ) објавија дека бесплатен ќе биде влезот за натпреварот со Литванија, кој ќе стартува од 18.00 часот во СЦ „Борис Трајковски“ – Скопје. Директен пренос ќе има на МРТ.

РФМ им вети премии на сениорските ракометни репрезентации за пласман на СП и ЕП