Белата куќа информира дека заканите на Иран за напад врз Израел се реални
Ударот на Иран врз Израел е „вистинска и веродостојна“ закана, соопштува Белата куќа, додека се зголемуваат стравувањата од непосреден напад од Техеран, пишува Би-би-си.
Големи се тензиите поради можноста Иран да се одмазди за воздушниот напад во кој загинаа високи ирански команданти пред речиси две недели.
Американските власти информираат дека голем напад врз Израел би можел да се случи веднаш.
Израел изјави дека е подготвен „одбранбено и офанзивно“.
Во петокот групата Хезболах соопшти дека лансирала десетици ракети од Либан кон Израел. Портпаролот на израелските одбранбени сили (ИДФ) изјави дека биле истрелани околу 40 проектили и два експлозивни беспилотни летала. Нема информации за жртви и нема индиции за вмешаност од други актери.
Претседателот Џо Бајден веќе му вети на Израел „железна“ поддршка на неговата земја во случај на ирански напад.