Книгата „Пет куси романи и неколку раскази“ од италијанската писателка Наталија Гинзбур е објавена од издавачката куќа „Артконект“ како дел од проектот „Пораки на надеж: инспиративна европска литература“, што оваа издавачка куќа го реализира до поддршка на програмата „Креативна Европа“ на ЕУ.

Наталија Гинзбург (1916-1991) е писателка и политичарка чии дела се маркантен дел современата италијанска книжевност на XX век. Родена е во Палермо, на Сицилија, а најголемиот дел од животот го поминала во Рим. Авторка е на раскази, есеи, драми и романи.

Критиката ја оценува Гинзбург како „блескава ѕвезда на современата италијанска книжевност… Нејзината магија се состои во чистата едноставност на нејзината проза, која неочекувано ја осветлува еден збор или една фраза, правејќи ја искрена, чиста и оригинална“ („Њујорк тајмс“).

Во книгата „Пет куси романи и неколку раскази“ се собрани кратките прозни форми на Гинзбург, во кои доминираат темите за семејството, љубовните односи и пријателството, но разработени се низ специфична призма која, иако се одликува со едноставност, всушност, е многу комплексна и ни отвора еден богат, уникатен и провокативен книжевен свет.

Преводот на македонски јазик го изработи професорката Анастасија Ѓурчинова, која за својот импозантен преведувачи опус, што опфаќа дела од Џовани Бокачо, Николо Макијавели, Итало Калвино, Клаудио Магрис, Сандро Веронези и други автори, двапати ја добила наградата „Златно перо“, а во 2015 година Министерството за култура на Република Италија ѝ ја додели Националната награда за преведувачки опус и афирмација на италијанската литература во странство.

(Текстот е објавен во „Културен печат“ број 186, во печатеното издание на весникот „Слободен печат“ на 8-9.7.2023)