Селекторот на фудбалската репрезентација на Аргентина, Лионел Скалони го објави списокот на играчи за претстојните квалификации за Светското првенство против Уругвај и Бразил.

На списокот го нема фудбалерот на Интер Мајами, Лионел Меси. Медиумите наведуваат дека причината е повреда на мускулот, но Аргентинците не ги открија причините за отсуството на 37-годишниот напаѓач.

Според пишувањата на медиумите, Меси се здоби со повреда во неделата при победата на неговиот Интер Мајами над Атланта јунајтед (2:1) во МЛС лигата.

Аргентина, актуелниот светски шампион, по 12 натпревари води во јужноамериканските квалификации со 25 бодови.

На 22 март (00.30 часот) Аргентина ќе му гостува на Уругвај, а на 26 март со почеток од 01.00 часот по македонско време ќе го пречека Бразил во Буенос Аирес.