Анкара со армија адвокати ќе го тужи Израел за „геноцид во Газа“
Турција заедно со повеќе од 2.000 адвокати ќе го тужи Израел за „геноцидот во Појасот Газа“, најави синоќа претседателот Реџеп Таип Ердоган, говорејќи на генералното собрание на Националниот студентски сојуз.
– Заедно со над 2.000 адвокати ќе поднесеме тужба до надлежните органи за геноцид. Ќе го следиме процесот, нема да го оставиме на половина пат. Цената ќе биде платена – изјави турскиот претседател.
Говорејќи за еднодневната посета на Германија, Ердоган оцени дека „целиот западен свет е крстоносна империјалистичка структура“.
– За жал, тоа го видов за време на мојата посета на Германија. Тоа го видов и во германскиот претседател Франк-Валтер Штајнмаер – истакна Ердоган.
Тој раскажа дека го повикал Берлин да помогне да бидат ослободени „десетиците илјади заложници во Газа“, а Анкара ќе направи напори за ослободување на стотиците заложници на Хамас.