Институтот „ПРЕСПА” денеска организира виртуелна презентација на анализата „10 плус 1 прашања за руската инвазија врз Украина и нејзиниот ефект врз Европа и Северна Македонија”.

Како што информираат од Институтот, на настанот, кој ќе се одржи на платформата „Зум”, ќе биде претставена анализата направена од членките на Работната група на експерти за надворешна и безбедносна политика и извршниот директор на Институтот.

Анализата одговара на прашања како, дали е ова конфликт, специјална операција или војна? Кои се шансите за нуклеарна војна? Како војната ќе влијае врз економијата на Северна Македонија? Како Северна Македонија може да ѝ помогне на Украина? Зошто е важно Србија да се приклучи кон санкциите? Дали има изворно проруско расположение во Северна Македонија? Што прави Европската Унија за да ѝ помогне на Украина? Може ли Украина да нè престигне во процесот на пристапување? Дали други прашања можат да го нарушат единството на Европската Унија? Дали сме подготвени за нов бегалски бран и како можеме поуспешно да се справиме со војната и нејзините ефекти.

Виртуелниот настан ќе започне во 17:30 часот и говорници на наго ќе бидат авторките на анализата, м-р Ивана Јордановска, постара соработничка и раководителка на работната група и доцент д-р Весна Попоска, м-р Весна Шапкоски, и Ангелина Цветковска, членки на работната група.

Настанот ќе го модерира Андреја Стојковски, извршен директор на Институтот „ПРЕСПА”.