Вардар 1961 се враќа од Португалија без бодови од дуелот со Порто, иако во еден дел од натпреварот имaше и водство.

„Црвено-црните“ во самата завршница дојдоа до шанса да освојат барем бод, но на крајот средбата заврши со триумф на домашната екипа од 27:24 (13:13).

Вардарци остануваат на осмото место во „А“ групата со три бода од шест натпревари, еден помалку од ПИК Сегед и Елверум.

Следната недела ги очекуваат две гостувања, прво патуваат за Париз кај ПСЖ, а од таму продолжуваат за Германија каде ќе се соочат со Флензбург.

Стевче Алушовски – тренер на Вардар 1961

– Честитки за Порто за победата. Бевме добри на стартот на мечот, посебно во одбраната. Но, имавме проблеми со нападот. Порто беше добар во брзите контранапади. Ги казнија сите наши грешки со брзи голови. Во последните десет минути направивме многу грешки во нападите, во додавањата. На Порто му посакувам сè најдобро, а ние мора да ги поправиме сите грешки за понатаму. Имаме многу натпревари во овој месец февруари.

Патрик Валчак – играч на Вардар 1961

– Почнавме одлично во одбраната и со реализирање на лесни голови од контранападот. Но, по неколку минути тоа престана да функционира и влеговме во проблеми. Во финишот исто така одбраната не беше лоша, но проблемот беше во нападот. Порто го искористи тоа да постигне лесни голови. Тешко е да се игра долго време „7 на 6“, ние исто така пропуштивме неколку обиди на празен гол.