Се комплетираше денеска и 11. коло на пет прволигашки натпревари, Шкендија по подолг период им се враќа на победите, на домашен терен бранителот на титулата од минатата сезона убедливо со 3:0 го совлада Силекс.

Тетовските „црвено-црни“ со прекрасниот погодок на Бразилецот Фелипе од слободен удар во 31. минута поведоа со 1:0. Зголеми албанскиот интернационалец Мици во 57. минута, а конечниот епилог беше поставен во 78. минута после автоголот на Србинот Благојевиќ за вкупно четврта победа во шампионатот.

Најефикасна денеска беше екипата на Академија Пандев која на домашен терен со 4:0 славеше против Македонија ЃП. За „пандевци“ по еднаш во листата на стрелците се запишаа Дориев (35`), Стоилов (38`), Рајковиќ (63`) и Томовски (79`).

Потоа, Вардар ја оправда фаворитската улога против Борец (2:0), велешката мрежа ја тресеа Аврамовски во третата и Адем во 71. минута од средбата.

Работнички продолжува да ги разочарува своите навивачи, овојпат на стадионот „Чаир“ – Скопје со 2:0 загуби од Шкупи. Трите бода за домаќините ги обезбедија Исени (36`) и бразилскиот интернационалец Сержињо (75`).

Струга Трим Лум ја оствари и четвртата победа (втора по ред) оваа сезона. Драгарски во 54. минута им донесе радост на стружани во триумфот над Ренова.

Прва македонска фудбалска лига

11. коло
Среда, резултати –

Академија Пандев-Македонија ЃП 4:0
Шкендија-Силекс 3:0
Шкупи-Работнички 2:0
Струга Трим Лум-Ренова 1:0
Вардар-Борец 2:0

Табела:

1.Академија Пандев 24 бодови
2.Вардар 24
3.Шкупи 16
4.Македонија ЃП 16
5.Шкендија 14
6.Струга Трим Лум 14
7.Ренова 13
8.Силекс 12
9.Борец 11
10.Работнички 10