Германскиот тенисер Александар Зверев денеска се пласираше во полуфиналето на Австралија опен во Мелбурн, откако во четири сета со 7:6, 7:6, 2:6, 6:1 го совлада светскиот рекет број 11 Американецот Томи Пол.

Вториот светски тенисер победи по три часа и 28 минути и по трет пат во кариерата се пласираше во полуфиналето на Австралија опен.

Тенисерите направија по еден брејк во првиот сет и се играше тајбрејк кој Зверев го доби со 7:1.

Исто така во вториот сет и двајцата имаа брејк топка и се играше нов тај-брејк кој германскиот играч го доби без загубен поен, 7:0.

Пол играше подобро во преостанатиот дел од мечот, двапати направи брејк на сервисот на Зверев и го освои третиот сет, но германскиот тенисер се засили во четвртиот и со два брејка и по третата меч топка се пласираше во полуфиналето.

Зверев ќе игра против подобриот од дуелот меѓу српскиот тенисер Новак Ѓоковиќ и Шпанецот Карлос Алкараз.