Јавниот превоз во Виена е исклучително ефикасен, добро организиран и прилагоден на потребите на граѓаните и туристите. Системот е еколошки прифатлив и финансиски достапен, со годишна карта која е посебно поволна. Интеграцијата на сите видови превоз овозможува лесно движење низ целиот град, а ноќните линии и метрото кое работи во викендите 24 часа ја прават Виена град кој никогаш не „спие“. Но да почнеме од почеток…

Јавниот превоз (Wiener Linien) во Виена е еден од најефикасните и најсигурните системи на јавен сообраќај во Европа. Се состои од мрежа на метро, трамваи, автобуси и возови. Системот е добро организиран, со висок степен на точност и овозможува лесно движење низ целиот град.

Виенскотo метро е главната артерија на градскиот сообраќај, со пет главни линии обележани со букви и броеви U1 до U6, различни бои и моментално има вкупна должина од 83,3 километри. Оваа мрежа се состои од пет линии кои покриваат различни делови од градот, со 109 станици кои им овозможуваат на патниците пристап до сите важни точки во Виена. Mетро линиитe работат од раните утрински часови (околу 5 часот) до околу полноќ со интервали од 1-5 минути во зависност од периодот, дали е утро кога граѓаните одат на работа или децата на училиште. За време на викендите и празниците, метрото функционира 24 часа, со ноќни возења на интервали од 15-20 минути.

Oтворено e во 1978 година, но неговата изградба започнала уште во 1969 година. Линиите се протегаат низ градот, а некои од нив имаат делници кои се над земјата. Во напредна фаза е проширувањето на виенското метро со линијата U5 (шеста линија) која ќе го поврзе централниот дел на градот со 17-тиот округ и ќе се вкрстува со линијата U2. За изградба на линијата U5 во Виена и проширување на линијата U2 предвидена е вкупна инвестиција од околу 2,1 милијарди евра, што вклучува поставување нови станици и траса, како и модернизација на инфраструктурата. Завршувањето на работите на линијата U5 е планирано во две фази, а конечниот завршеток е планиран до крајот на 2026 година, со цел да стане првата целосно автоматизирана линија на метро во Австрија.

Трамвајскиот сообраќај е една од најстарите и најомилените опции на јавен превоз во Виена. Електрификацијата на трамвајскиот систем во Виена започнала во 1897 година, кога трамваите со коњска влеча почнале да се заменуваат со електрични трамваи. Виена тогаш била еден од првите европски градови што воспоставил целосно електричен трамвајски систем, што значително ја подобрило брзината и капацитетот на јавниот превоз. До 1903 година, електричните трамваи целосно ги замениле трамваите со коњска влеча.
Денес јавниот превоз го одржува трамвајската мрежа со повеќе од 30 линии, која се протега на повеќе од 220 километри, трамваите се чести и редовни, а поголемиот дел од линиите функционираат до полноќ, додека одредени линии имаат ноќни возења, овозможувајќи ефикасен превоз на илјадници жители на Виена и туристи секојдневно.

Автобускиот сообраќај ги покрива оние делови од градот кои не се во непосредна близина на метро или трамвајските станици. Постојат дневни линии кои сообраќаат од 5 часот до полноќ и ноќни автобуски линии кои го покриваат градот помеѓу полноќ и 5 часот наутро, со фреквенција од околу 30 минути, а за време на викендите и празниците ги дополнуваат ноќните линии на метрото.

Покрај сите овие превозни средства, постојат и приградски возови кои го поврзуваат центарот на градот со предградијата и блиските населени места во околината на Виена. Овие линии се дел од пошироката мрежа на австриските железници и главно се користат за подолги релации. Најважната линија е S7, која го поврзува центарот на градот со аеродромот во Виена.

Јавниот превоз во Виена користи единствен тарифен систем, што значи дека еден билет важи за сите видови превоз (метро, трамвај, автобус и S-Bahn во рамките на зоната 100, која го покрива градот). Постојат неколку видови билети: единечен билет, цената за едно возење изнесува околу 2,40 евра и важи за неограничен број преседнувања во рок од 90 минути; дневен билет кој чини околу 8,40 евра и важи неограничено во текот на еден ден; неделен билет, со цена од околу 17,10 евра и важи од понеделник до недела; месечен билет кој чини 51 евро и важи за цел месец и годишен билет кој е особено популарен меѓу жителите на Виена и чини 365 евра (1 евро дневно).

Билетите може да се купат на автоматите во метро станиците, во автобусите и трамваите, како и преку апликацијата Wiener Linien.

Важно е да се напомене дека во 2024 година, Wiener Linien има продадено над 900.000 годишни билети за јавен превоз во Виена. Овој годишен билет, познат како 365-Euro-Ticket, овозможува неограничено користење на сите видови јавен превоз (метро, трамваи, автобуси) во рамките на зоната 100, која го покрива целиот град Виена.

За овој систем на превоз во Виена да функционира, потребни се и одредени инвестиции, како во превозните средства така и во одржувањето на инфраструктурата. Wiener Linien секоја година вложува околу 400 милиони евра за модернизација на инфраструктурата и проширување на мрежата. Овие инвестиции вклучуваат обновување на трамвајските шини, унапредување на метро линиите и воведување на еколошки решенија. Исто така, компанијата планира да го прошири капацитетот на своите возила, како што се трамваите и автобусите, за да се намали гужвата во градскиот превоз.

Еден од важните аспекти на идниот развој на јавниот превоз во Виена е преминувањето на еколошки одржливи решенија до 2040 година. Wiener Linien активно воведува електрични возила во својот систем на јавен превоз. Иако трамваите веќе се електрични, новата генерација на трамваи со ниска емисија користи напредни технологии кои ја намалуваат потрошувачката на енергија и емисиите на CO2 за време на возењето. Овие трамваи користат системи за регенерација на енергија кои овозможуваат враќање на дел од енергијата во мрежата, со што дополнително се намалува потрошувачката на енергија.