Членовите на Претседателството на БиХ, Денис Беќировиќ и Жељко Комшиќ го обвинија лидерот на босанските Срби, Милорад Додик дека со своите постапки предизвикува криза која што може да доведе до распаѓање и војна во земјата, а тој возврати со порака дека Република Српска (РС) со сите средства ќе се бори против обидите да и се ускратат овластувањата, пишува Индекс.хр.

Нова размена на остри зборови уследи по најавата на Додик дека в понеделник ќе организира потпишување на заедничка изјава на партиите застапени во парламентот на РС со која на БиХ како држава и се оспорува правото на имот. Додик инсистира на тоа дека сите недвижни имоти на територијата на БиХ кои ги наследила како државно сопствеништво всушност се имот на ентитетите и на тој начин и пркоси на пресудата на Уставниот суд на БиХ кој на ентитетите им збарани да располагаат со тој имот се додека тоа не се уреди со закон кој ќе го донесен парламентот на БиХ.

Додик сега ги повикува партиите од РС на радикализација, односно во случај на донесување на државниот закон за имот сите Срби вработени во телата на власта на БиХ да се повлечат од тие институции, а прво тоа да го сторат судиите од Уставниот суд на БиХ. Со изјавата која што ја предложи се заканува и со воспоставување контрола на движење на меѓуентитетската граница.

Беќировиќ му возврати дека тие чекори се „играње со оган” со опасни последици бидејќи значат отворање пат кон сепаратизам и можат да го загрозат мировниот процес. Однесувањето на Додик, Беќировиќ го спореди со она на Радован Караџиќ и Ратко Младиќ кое доведе до војна во БиХ и додаде дека Додик сега нема ниту десет отсто од капацитетот кој што го имале тие двајца па не може да смета на остварување на своите цели. Беќировиќ му порача да не си игра со државата.

Комшиќ, пак, коментираше дека Додик оди по патот на конечно отцепување на РС, а во тоа на некој начин му помага и лидерот на ХДЗ, Драган Човиќ бидејќи не се откажува од нивното претходно прокламирано партнерство.

Додик не остана должен и му возврати на Беќировиќ дека тој го урива мирот. Му порача „да не си игра со големи зборови и да не се заканува со туѓо оружје”.

– Босанските Срби еднаш ја одбранија својата земја, па ако треба тоа повотно ќе го направат, вели Додик.