Францускиот актер Жерар Депардје за првпат се огласи за обвинувањата за силување и сексуален напад против него, велејќи за францускиот весник „Фигаро“, дека тој бил жртва на линч организиран од „медиумски суд“, пишува „Дејли мејл“.

Во отвореното писмо напишано до „Фигаро“ тој тврди дека: „никогаш не сум злоставувал жена. Да повредам жена за мене би било како да ја клоцам мајка ми во стомак“. Тој додаде: „До судот за медиуми, за линчот што е резервиран за мене, го имам само својот збор да се бранам“.

Ова е првпат Депардје лично да коментира по серијата обвинувања. Во декември 2020 година, тој беше ставен под официјална истрага за наводно силување и сексуален напад, откако актерката Шарлот Арнолд го обвини дека ја нападнал во два наврати во неговиот дом во Париз во 2018 година, кога таа имала 22, а тој 70.

Неговиот адвокат рече дека тој ги негира обвинувањата. По обидот на адвокатите на Депардје да го отфрлат случајот, главниот париски обвинител рече дека има „сериозни и потврдени докази“ кои го оправдуваат одржувањето на обвиненијата. Истрагата ќе продолжи понатака.

Во писмото до „Фигаро“ тој пишува за наводите на 22-годишната актерка, која на полицијата ѝ рекла дека била силувана во неговиот дом. Тој рече дека секоја средба со жената била консензуална.

„Доброволно дојде во мојата спална соба. Таа вели дека денес била силувана. Таа се врати по втор пат. Меѓу нас никогаш немало ограничување, насилство или протест“, напиша актерот.

Адвокатот на жената, Карин Дури Дибол, на државната телевизија „Франс ТВ инфо“ ја оспори верзијата на Депардје за настаните.

Таа објасни дека начинот на кој пишувал за жената сугерирал дека таа е анонимен странец, но всушност отишла во домот на Депардје затоа што го познавала. Таа била ќерка на долгогодишен пријател на Депардје.

„Ја држел во скут кога била бебе, па со него имала татковска врска. Тој ја поканил [во неговиот дом] да ја праша како е и, во тие околности, никој не очекува дека ќе биде сексуално нападнат по 10 минути“, објасни адвокатот.

Адвокатот, исто така, рече дека, иако Депардје рече дека не бил предатор или силувач, судскиот систем ќе одлучи за тоа.

Неговиот адвокат рече дека актерот ги отфрлил обвинувањата. По обидот на адвокатите на Депардје случајот да биде отфрлен, главниот обвинител во Париз рече дека има „сериозни и потврдени докази“ кои го оправдуваат продолжувањето на истрагата.

Во април, истражувачката веб-страница „Медиапарт“ објави наводи за сексуално насилство врз него од повеќе од десетина жени, а некои тврдења датираат и од раните 2000-ти. Адвокатите на Депардје рекоа дека тој негира какво било криминално однесување.

Инаку Депардје, еден од најпознатите француски актери, се појави во повеќе од 170 филмови и се здоби со меѓународна слава со улоги на англиски јазик. Тој продолжи да работи плодно во француската кинематографија во последниве години и покрај тоа што беше ставен под официјална истрага за наводно силување.