Затворски чувар од „Идризово“ доби кривична пријава бидејќи дозволил затвореник да избега од затворот. Искористувајќи ја довербата на полицаецот, затвореникот му ја побарал службената картичка за отворање на безбедносната врата од Отвореното одделение, со образложение дека ќе оди во друг дел на одделението, каде претходно бил ангажиран.

„Откако затвореникот ја отворил безбедносната врата, му ја вратил картичката на полицаецот и се оддалечил кон „зелената капија“. Подоцна, при проверка на состојбата било констатирано дека недостасува затвореникот, односно дека побегнал од затворот“, се вели во соопштението од МВР.

Бегството се случило на 20 мај оваа година, а истиот ден околу 9 часот, затвореникот извршил разбојништво во казино на улицата „Благоја Стефковски“ во скопската населба Автокоманда. За кратко време осуденикот бил пронајден од полицијата и уапсен, а кај него биле пронајдени украдените предмети и еден пиштол „Чешка Зброевка Ц3 85“.