Денеска официјално започнува со работа дигиталната библиотека „Македонска држава“. Платформата содржи електронски книги, историски документи и истражувања кои опфаќаат повеќе од 150 години македонска историја, култура, поезија и патриотско творештво.

„Целта на „Македонска држава“ е да им овозможи на сите љубопитни умови, без разлика на возраста или образованието, слободен и објективен увид во богатото културно и историско наследство на Македонија. Оваа библиотека претставува централно место за учење, истражување и инспирација“, велат од тимот кој ја подготвува архивата.

Посебен акцент е ставен на внимателно селектирани содржини, архиви со најзначајните настани и личности, организирани во јасни категории и со лесна навигација. Целта е историјата да биде жива, разбирлива и достапна за секого, без ограничувања и филтри.

„Со дигитализацијата на материјалите и нивната бесплатна достапност, ја отвораме вратата за нова генерација истражувачи, ученици, студенти, новинари и сите љубители на македонската култура“, додаваат од тимот зад проектот.