Западните лидери се загрижени за американскот претседател Бајден и за неговата способност дали ќе може да отслужи уште еден мандат. Се погласни се повиците за Бајден да се откаже од претседателската трка овој ноември, а неговите обиди да ги намали стравувањата за неговата реизборна кандидатура, на Самитот беа нарушени со два сериозни гафа. Сепак, повеќето лидери се децидни дека се работи за лапсус, па во нивните коментари за настапот на претседателот на САД, тие укажаа и на неговите квалитети и бројни достигнувања кои според нив ги имал во неговиот мандат, aнализира Би-би-си. 

Францускиот претседател Емануел Макрон рече дека Бајден е „надлежен“ и „јасен за прашањата што добро ги знае“, додека британскиот премиер Стармер рече дека е „во добра форма“.

Но, првиот гаф на Бајден, во кој тој го претстави украинскиот лидер Володимир Зеленски како претседател Путин, беше исмеан во руските медиуми.

А подоцна, на прес-конференција – првото јавно појавување без сценарио на Бајден по дебатата – тој се осврна на неговиот „потпретседател Трамп“ кога сакаше да каже Камала Харис.

Американскиот претседател беше под притисок да поднесе оставка по катастрофалниот настап пред две недели во дебатата со неговиот републикански ривал на претстојните избори, Доналд Трамп.

„Го видов како и секогаш претседател кој е одговорен, јасен за прашањата што добро ги знае. Сите понекогаш правиме лапсуси, ми се има случено и порано, веројатно ќе ми се случи утре. Би ве замолил да ја покажете истата попустливост што треба да се покаже меѓу грижливите луѓе“, рече Макрон.

На гафовите се осврна и германскиот канцелар Олаф Шолц.

„Се случуваат лапсуси и ако секогаш ги следите сите, ќе најдете доволно од нив“, рече тој.

Премиерот на Обединетото Кралство, Стармер, во неколку наврати за време на Самитот рече дека американскиот претседател постигнал многу и има со што да се гордее.

„Поминавме два дена од овој совет и дојдовме до многу добар исход… И мислам дека треба да му се даде признание за тоа“.

Канадскиот премиер Џастин Трудо рече дека е привилегија и задоволство да се работи со Бајден.

„Длабочината на искуството на [Бајден], неговата промисленост, неговата непоколебливост за најголемите прашања и предизвици на нашето време е заслуга за работата што сите ја работиме заедно“, рече тој.

Полскиот претседател Анджеј Дуда, кој се смета за близок со поранешниот претседател Трамп, рече, цитиран од АФП: „Разговарав со претседателот Бајден и нема сомнеж дека се е во ред“.

Во меѓувреме, финскиот претседател Александар Стуб ја комбинираше одбраната на Бајден со стравувањата за атмосферата на изборите во САД.

„Немам апсолутно никаква грижа за капацитетот на актуелниот претседател на Соединетите држави да ја води својата земја и да ја води нашата борба за Украина и да го води НАТО“, рече тој, пренесе АФП.

„Единственото нешто што ме загрижува е тоа што политичката клима во САД во моментов е премногу токсична, многу поларизирана и тоа не остава доволно простор за цивилизирана и конструктивна дебата“, додаде во изјавата.

Сепак, сите лидери на НАТО не беа подготвени да се изјаснат во име на Бајден. Унгарскиот премиер Виктор Орбан, наводно, не дал речиси никаков коментар за медиумите во Вашингтон. Наместо тоа, тој веднаш по завршувањето на Самитот замина во Мар-а-Лаго, резиденцијата на Трамп во Флорида, каде што тие разговараа за војната во Украина.

„Разговаравме за начините за постигнување мир“, рече Орбан на социјалните мрежи. „Добрата вест на денот: тој ќе ја реши!

Но, ако лидерите на сојузничките земји не беа подготвени да го критикуваат американскиот претседател за неговите слабости, Москва беше слично воздржана.
Портпаролот на Кремљ, Дмитриј Песков, рече дека гафовите се очигледно лапсус и дека не планираат да се мешаат во внатрешните работи на САД.

Не беше така со руските медиуми, кои на големо известуваа за збунетоста на „г-дин Бајден со г-дин Путин за г-дин Зеленски“.

Официјалната телевизија „Россија“ го прикажа на врвот на билтенот, велејќи дека „вазалите на Америка се преправале дека ништо не забележале“.

НТВ рече дека Бајден никогаш не бил толку блиску до фијаско и дека неговиот „најнов лапсус е достоен за Оскар“.

И популарниот дневен весник „Московски Комсомолец“ објави напис со наслов „Сенилни лидери“, споредувајќи го Џо Бајден со постарите комунистички водачи на СССР.

„Што е поопасно, мајмун со граната или тресење на рака над нуклеарното копче?“ праша таа.