На турнирот од Светската премиер карате лига во Анталија, Турција, кој ќе се организира од 15 до 17 март ќе настапат Петар Заборски и Петар Спасеновски.

Заборски и Спасеновски, кои се членови на карате клубот „Макпетрол“, ќе бидат единствените каратисти од Македонија кои обезбедија норма за учество.

Според најавите Заборски ќе се бори во категоријата до 75 килограми, а Спасеновски во категоријата до 84 кг.

Заборски и Спасеновски се меѓу 32 каратисти на ранг-листата на Светската карате федерација (ВКФ) што им дава можност да се натпреваруваат против најдобрите од светот.

Секој каратист во својата група во елиминацискиот дел ќе има три борби. Само првопласираниот ќе се пласира понатаму, односно во четвртфиналето.

Инаку на овој турнир во Анталија свој настап ќе имаат 370 каратисти од 60 држави.