За учество на Олимписките игри во Токио ќе биде потребна вакцина!?
Бах го пофали новиот напредок во брзото тестирање како поттик за одржување на Олимписките игри.
Претседателот на Меѓународниот олимписки комитет (ИОК), Томас Бах, денеска во Токио соопшти дека сите спортисти и навивачи ќе бидат охрабрени да се вакцинираат против коронавирусот, со цел да се заштити јапонскиот народ.
Препорачано
Бах додаде дека вакцинацијата нема да биде задолжителна, но не се сомнева дека ќе биде силно иницирано.
Претседателот на ИОК е во прва посета на Јапонија по одложувањето на Олимписките игри пред околу осум месеци поради пандемијата на коронавирусот.
– Со цел да се заштити јапонскиот народ и од почит кон нив, ИОК ќе се потруди што повеќе луѓе да дојдат тука со вакцина, доколку таа биде достапна дотогаш – рече Бах по разговорите со јапонскиот премиер Јошиде Суга.
Бах го пофали новиот напредок во брзото тестирање како поттик за одржување на Олимписките игри.
– На олимписките учесници нема да им биде приоритет вакцинација пред медицинските сестри, лекарите и луѓето кои ги одржуваат нашите заедници во живот. Следната година Олимписките игри ќе бидат светло на крајот од овој мрачен тунел – вели Бах.
Тој исто така навести дека Меѓународниот олимписки комитет ќе покрие барем дел од трошоците за вакцинација.
– Ние сме решени да ги организираме Олимписките игри следното лето како доказ дека човештвото го победил вирусот – се зборовите на Суга.
Сè уште не е познато колку ќе чини одложувањето на Олимписките игри, кои се предвидуваа за оваа година, а некои извештаи од Јапонија зборуваат за штета од две до три милијарди долари.
Покрај финансиските проблеми, организаторите на Олимписките игри се соочуваат и со истрага на француските власти за корупција при доделувањето на домаќинството на Токио.
Минатата година, претседателот на јапонскиот олимписки комитет, Цунеказу Такеда, поднесе оставка откако призна дека потпишал исплата од два милиони долари на консултантска компанија во Сингапур. Се верува дека парите биле префрлени за да влијаат на гласовите на ИОК.
Олимписките игри во Токио треба да се одржат од 23 јули до 8 август 2021 година, а Бах рече дека се надева дека на трибините ќе има „разумен број“ на навивачи.
