Стриминг платформата Ејџ-би-о Макс, која ја прикажува серијата „And Just Like That“, објави дека ќе се снима третата сезона од серијата.

Ова ново поглавје на серијата „Sex and the City“ ги следи Кери, Миранда и Шарлот на нивното патување од компликуваната реалност на животот и пријателството во нивните 30-ти, па до уште покомпликуваната реалност во нивните 50-ти.

Во „And Just Like That“ глумат актерките Сара Џесика Паркер (Кери Бредшо), Синтија Никсон (Миранда Хобс) и Кристин Дејвис (Шарлот Јорк).

Актерката Ким Катрал, која го глумеше ликот Саманта Џоунс во оригиналната серија, е единствена од познатата четворка која одлучи да не ја репризира својата улога, со исклучок на едноминутната сцена во последната епизода од втората сезона на „And Just Like That“.

Извршниот продуцент на серијата, Мајкл Патрик Кинг, во соопштение за медиумите истакна дека е воодушевен од продолжението на серијата.

„Драго ми е што поминуваме толку време во универзумот на ‘Sex and the City’ и новите животни приказни на амбициозните ликови кои ги играат неверојатни актери“, истакна продуцентот на серијата.

Актерската екипа на третата сезона сѐ уште се чува во тајност.

Иако доби бројни критики, „And Just Like That“ е најгледаната серија на Ејџ-би-о Макс платформата.