Унгарија мора многу брзо да ја зајакне независноста на судството за да има реални шанси да добие барем нешто од 15,4 милијарди евра наменети за Будимпешта од стимулацијата на Европската унија за закрепнување од ковид-19, изјави заменик-претседателката на Европската комисија Вера Јурова.

Унгарија треба да добие околу 5,8 милијарди евра бесплатни грантови и уште 9,6 милијарди евра евтини заеми од ЕУ, но европскиот блок ги суспендираше сите плаќања додека Будимпешта не ги спроведе реформите за подобрување на независноста на судството и борбата против корупцијата.

– Тие ќе мора да усвојат закони кои ќе ја зајакнат позицијата на судиите, што ќе го зајакне дејствувањето против корупцијата – рече Јоурова откако унгарската делегација разговараше со претставниците на ЕК оваа недела.

Јурова, која е одговорна за одржува ње на демократските стандарди во 27-члената унија, додаде дека подобрувањето на јавните набавки во Унгарија е уште еден услов.

– Тоа се многу конкретни работи кои унгарската влада вети дека многу брзо ќе ги исправи или ќе ги направи … времето работи против нив, изјави таа. Европските даночни обврзници „не сакаат нивните пари да одат на места каде што нема почитување на владеењето на правото, каде што животот е многу тежок за ЛГБТ луѓето или другите малцинства – нагласи Јурова.

Унгарија и Полска се единствените членки на европскиот блок кои заостануваат во добивањето средства, поради долготрајните критики на ЕК дека нивните влади и штетат на демократијата и владеењето на правото. Минатата година ЕК ги суспендираше средствата за закрепнување на Будимпешта и предложи замрзнување на уште 7,5 милијарди евра, кои Унгарија вообичаено ќе ги добиеше од буџетот на ЕУ како дел од средствата наменети за посиромашните земји-членки на блокот.