Метален прстен со дијаметар од приближно 2,5 метри и тежина од околу 500 килограми паднал во селото Мукуку на југот на Кенија, а властите веруваат дека е дел од вселенско возило за лансирање ракета, пренесуваат странските медиуми.

Кениската вселенска агенција (КСА) соопшти дека прелиминарните проценки покажуваат дека објектот е прстен што ја одвојува ракетата од вселенското возило, кое е дизајнирано или да изгори при повторното влегување во атмосферата на Земјата или да падне над ненаселени области.

КСА соопшти дека заедно со други агенции и локални власти ја обезбедиле областа и го отстраниле вселенскиот отпад, што сега се истражува. Од КСА појаснија дека се работи за „изолиран случај“.

„Сакаме да ја увериме јавноста дека објектот не претставува непосредна закана за безбедноста. Нашите експерти ќе го анализираат објектот, ќе ги искористат постоечките рамки за да го идентификуваат сопственикот и ќе ја информираат јавноста за следните чекори и исходи“, соопшти КСА.