Отровниот воздух кој мириса на метал во Скопје сериозно им наштетува на граѓаните и на нивното здравје, особено на хронично болните. Освен непријатниот мирис на изгорено, воздухот е густ и загаден, а помешан со маглата прави „прст пред око да не се гледа“. Апликациите за мерење на ПМ 10 штетните честички со денови „трепкаат црвено“ и го рангираат главниот град на врвот на најзагадените во Европа. Сето ова доаѓа со препораки да не се отвораат прозорците, да се набавуваат прочистувачи за воздухот и да се носат маски. Оваа очајна состојба, придонесува и амбулантите на матичните лекари да се полнат со пациенти што имаат потешкотии со респираторниот тракт, а згора на тоа вирусните инфекции и грипот се активни како и секогаш во овој период од годината.

Доктор Олга Спасова од Универзитетска клиника за респираторни заболувања кај децата „Козле“ за „Слободен печат“ вели дека во текот на продолжениот празничен викенд, Клиниката била засилено екипирана, се отпишувале деца со подобрена здравствена состојба за да се направи место за новите пациенти. Во моментот има 90 хоспитализирани пациенти во оваа болница, од кои „лежечки“ се 70, а другите 20 се во дневната болница. Но, болницата, тврди доктор Спасова, работи непречено и капацитетите се доволни за да се задоволат потребите на пациентите.

-Очекувано во овој период секоја година има зголемен број на прегледи. Така беше и лани и годината претходно. Ние го очекуваме тоа поради фактот што сезоната на грип е во тек. Сега се бележи пораст на бројот на заболени со грип – и деца и возрасни. Се очекува пикот на сезоната со грипот да биде на крајот на јануари или на почетокот на февруари. Во моментот имаме 90 хоспитализирани пациенти, од кои 70 се лежечки, а другите 20 се во дневната болница. Главните симптоми со коишто се соочуваат пациентите се температура, кашлица, болки во грлото и изнемоштеност. Зголемениот број на пациенти во овој период е поради тоа што е сезона на респираторни заболувања. Ваквата состојба не е само во загадените, туку и во градовите каде што нема загадување – вели доктор Спасова за „Слободен печат“.

Таа додава дека фактот што сега повеќето деца се во затворени простории, како на пример градинки, исто како и возрасните – кои во колективите се во затворени, мали простории каде не се отвораат прозорци – придонесува инфекциите што се шират по капков пат да се шират побрзо од човек на човек.

-Тоа се случува поради блиските контакти. А загадувањето на воздухот влијае на респираторниот тракт на друг начин, не е поврзан со вирусните инфекции и грипот – додава таа.

Матичниот доктор Бојан Трајковски за „Слободен печат“ истакнува дека загадениот воздух целосно влијае на здравствениот систем, особено на респираторниот тракт кој е најпогоден. Но, тој открива дека студиите покажувале и нешто неочекувано, дека загадениот воздух го афектира буквално целото тело.

– Може да влијае на кардиоваскуларниот и нервниот систем. Различни студии го покажуваат тоа. Влијае на целиот органски систем и на новороденчињата уште од утробата на мајката. Најчестата патологија што ја гледаме е респираторната. Гледаме пациенти што имаат хронично опструктивно белодробно заболување, хроничен бронхитис, алергиски воспаленија, воспаление на синуси, ларингит. Респираторната патологија кај хроничарите е најизразена. Дури и гледаме во праксата, промени со хипертензијата, односно нагли промени на притисокот, хипертрофија на срцевиот мускул. Во сето тоа удел има загадувањето. И карциномот на белите дробови и туморозните малформации се врзани со ова што го дишеме, освен со пушењето цигари, вели доктор Трајковски.

Зголемен е интензитетот со кој граѓаните и децата бараат здравствени услуги кај матичните лекари. Телефонските повици за совети исто така се побројни.

-Гледаме повеќе болни зашто до пред неколку денови бевме активни со прославите, многу луѓе се „испомешаа“. Вирусите се присутни, но симптомите се влошуваат како резултат на воздухот. Да бидам искрен, немаме третирање како порано, дека „ќе ти помине за неколку дена“. Овде продолжуваат симптомите во поинаква форма и понатаму, после болеста, или со течење на носот или со кашлица – додава Трајковски.

Тој препорачува граѓаните да носат маски во континуитет додека е загадено.

-Маските да бидат со филтри, а сите што имаат можност, дома да набаватт прочистувач за воздухот. Кога ќе ги извадат филтрите, ќе сфатат колку е загадено. Најважно е ако се во можност, да излегуваат од Скопје, да се практикува соодветна исхрана, да се намали со алкохолот за да не се „бутка“ имунитетот и да се прекине со пушењето. Тие што пушат, имаат од 10 до 15 пати поголем ризик од респираторна патологија – додава докторот. 

Податоците на Институтот за јавно здравје за последната недела од декември покажуваат дека во земјава се пријавени 221 случај на грип, што е зголемување за 59 проценти споредено со претходната недела. Вакцинацијата против сезонски грип е најефикасна заштита од ова заболување. ИЈЗ препорачува вакцинација на целото население, а Министерството за здравство годинава обезбеди над 70 илјади четиривалентни вакцини за ризичните групи – граѓани повозрасни од 65 години, деца на возраст од 6 до 59 месеци, хронично болни, бремени жени и здравствени работници. Вкупно 70.247 граѓани се вакцинирале против грип во Македонија што ја прави оваа вакцина една од оние во кои граѓаните имаат најголема доверба.