Од Министерството за труд и социјална политика информираат дека ќе биде направен вонреден инспекциски надзор во градинката во Шуто Оризари, откако родител пријави дека неговата 11-месечна ќерка има скршеница на десното рамо и побара одговорност од негувателките.

Министерството за труд и социјална политика информира дека официјално нема добиено претставка за случајот во градинката „8-Април“ во Шуто Оризари. Меѓутоа по допрен глас од медиумите и по службена должност, во текот на денот ќе биде извршен вонреден инспекциски надзор над работата на установата и стручниот кадар, од страна на инспектори за заштита на децата. За утврдување на фактичката состојба и неправилности во работата на стручниот кадар, кој го згрижувал детето, ќе бидат преземени мерки согласно Законот за заштита на децата, велат од МТСП за МИА.

Според информациите од МВР, таткото Имер Салиу во петокот пријавил, дека неговата малолетна ќерка се здобила со тешка телесна повреда во градинка на подрачје на Шуто Оризари.

Во СВР Скопје, И.С.(28) од Скопје пријавил дека во текот на денот во детска градинка на подрачје на Шуто Оризари неговата малолетна ќерка се здобила со тешка телесна повреда, констатирана во Ургентен центар во Комплексот клиники „Мајка Тереза“. Според пријавеното, неговата сопруга ја однела нивната ќерка во градинката околу 8 часот и бидејќи е во период на адаптација, ја зела во 10 часот. Исто така, според пријавеното, кога го донела дома и почнала да го пресоблекува, девојчето не престанувало да плаче, по што го однеле во Ургентниот центар, каде што лекар ја констатирал повредата, се наведува во соопштението на Министерството.

Од МВР информираа дека се преземаат мерки за расчистување на случајот.

Салиу во саботата изјави дека бебе од 11 месеци не може само да си ја скрши коската, не може да стои, да зборува, да оди и треба да се утврди дали во тој момент негувателките внимавале на бебето.

Тоа бебе било под надзор на негувателките кои во моментот на настанатата повреда треба да се утврди дали се фактор на таа повреда или пак не внимавале на неа кога се случило ова, не знаеме. Не добивме никаков конкретен одговор за ова. Немаме одговор. Како родител загрижен, барам одговорност од сите надлежни институции, особено општина Шуто Оризари која ги вработува негувателките, вели Салиу.

Скандал во градинка во Шуто Оризари: Бебе од 11 месеци со скршеница на рамото