Новиот спортско рекреативен центар кој ќе се наоѓа во населеното место Радишани – горна зона, ќе го носи името „Христо Матов“, а ќе се протега на повеќе од 2000 метри квадратни.

Градоначалникот на Општина Бутел, Дарко Костовски објаснува дека станува збор за место кое во минатото било главна локација за рекреација и забава во Радишани, но кое во изминатите години беше целосно запуштено и претворено во депонија.

Спортско рекреативниот центар  „Христо Матов“ сега ќе биде целосно обновен и ќе има повеќе содржини – ќе биде изградено модерно фудбалско игралиште со вештачка трева, нова метална ограда и ново лед осветлување, потоа ќе бидат поставени нови трибини со нови столчиња. Ќе има и баскет игралиште со специјална подлога, комплетно ќе биде реконструирано детското игралиште, а ќе има и фитнес зона за вежбање и рекреирање.

Покрај тоа на просторот ќе биде изведен парк, зелени површини, а ќе биде поставена и нова урбана опрема и ново лед осветлување.