Според проценетите податоци на Државниот завод за статистика, стапката на раст на бруто-домашниот производ (БДП) за првото тримесечје од 2019 година е 4.1 %.

Во првото тримесечје од 2019 година, најголем пораст е забележан во секторите: А – Земјоделство, шумарство и рибарство од 13.6 %; Ѓ – Градежништво од 7.0 % и Е, Ж и З – Трговија на големо и трговија на мало; поправка на моторни возила и мотоцикли; Транспорт и складирање; Објекти за сместување и сервисни дејности со храна од 6.6 %.

Финалната потрошувачка на домаќинствата вклучувајќи ги непрофитните институции кои им служат на домаќинствата, во првото тримесечје од 2019 година номинално расте за 3.9 %, а нејзиното учество во структурата на бруто-домашниот производ изнесува 63.5 %.

Во истиот период, извозот на стоки и на услуги номинално се зголеми за 14.9 %, а увозот на стоки и на услуги забележа зголемување во номинален износ од 12.6 %.