Во вторник (29 март) во Порто со почеток од 20.45 часот ќе се игра финалето помеѓу Португалија и Македонија за пласман на Светското првенство во Катар.

Португалците ќе ја имаат огромната поддршка од трибините на стадионот „Драгао“ пред 50.000 навивачи, а избраниците на селекторот Благоја Милевски ќе се обидат да направат уште едно големо изненадување, откако во полуфиналето го елиминираа актуелниот европски шампион Италија.

Европската фудбалска куќа (УЕФА) објави кој ќе биде главен судија на мечот во Порто, човекот кој ни донесе „среќа“ на 12 ноември 2020 година во Тбилиси во победата над Грузија (0:1) и така првпат во нашата фудбалска историја обезбедивме пласман на Европско првенство.

На центарот ќе застане Ентони Тејлор од Англија, ќе му помагаат неговите сонародници Гери Бесвик и Адам Нан.

Првата португалска ѕвезда Кристијано Роналдо добро го познава Тејлор од мечевите во Премиер лигата и нема баш пријатни сеќавања.