Италија од утре го укинува задолжителното носење на маски на отворено, но се препорачува да се носат на места каде има многу луѓе, додека останува на сила носењето на маски во затворен простор, пишува агенцијата Анса.

Вишиот институт за здравство, најголемиот државен авторитет, предупредува дека се уште има два милиони и 700.000 лица постари од 60 години, кои не ја примиле ниту првата доза на вакцината.

Како што пишува агенцијата, постои загриженост од ширењето на делта сојот на вирусот, кој во Италија порасна за четири пати во последниот месец.

Премиерот Марио Драги на прес-конференција изјави дека таа процена е веројатно потценета, бидејќи во Италија, за разлика од другите европски држави, малку се утврдува со која сорта на вирусот некое лице е заразено.

Професорката на универзтитетот во Падова, имунологот Антонела Виола, советува на одмор да одат само оние кои ги примиле двете дози на вакцината, бидејќи делта сојот на вирусот, како што тврди, помалку реагира на антитела, па оние кои ја примиле само едната доза на вакцината, можат не само да се заразат, туку и да се разболат.