Утринава во БиХ се уништени 80 тони банани. Околу 2.000 килограми праски увезени на пазарот се повлечени поради зголемено присуство на пестициди. Федералниот инспекциски орган сега ја испитува и валидноста на грозјето и мандарините. Проблемот со увозот на овошје и зеленчук се повторува со години, а последиците по здравјето на граѓаните можат да бидат сериозни, пишува Н1.

Федералните гранични инспектори веќе неколку недели спроведуваат зголемени контроли врз увозот на овошје, најмногу за грозјето, мандарините и праските. На почетокот на септември беше спречен увозот на 40 тони банани од Костарика, а претходно беше спуштена рампата за пченка од Србија, компири и јагоди од Египет и праски и тиквички од Албанија.

Граѓаните на БиХ истакнуваат дека имаат сè помалку доверба во безбедноста на храната на пазарот.

Агенцијата за безбедност на храната на Босна и Херцеговина објаснува дека проблемот често се јавува поради законска регулатива која не е хармонизирана со Европската унија.

„Се случува нешто што е дозволено во ЕУ да не може да се пласира на пазарот во Босна и Херцеговина. Ова е проблем со прописите кои сè уште не се хармонизирани. Испративме итно барање тие да се донесат што е можно поскоро, со цел да се заштити здравјето на граѓаните“, истакнува Санин Танковиќ, директор на Агенцијата.

Здруженијата на потрошувачи предупредуваат дека контролата на храната врз увезените производи е недоволна, додека домашните производители се под многу построг надзор.

Стравувањата на потрошувачите се оправдани, бидејќи присуството на пестициди не може да се види со голо око, ниту пак предизвикува непосредни реакции. Сепак, континуираната потрошувачка може да има канцерогени последици.