Виолина стара 285 години и вредна 175.000 евра украдена од британски паб
Лондонската метрополитенска полиција апелираше за информации откако виолина стара 285 години и вредна повеќе од 175.000 евра беше украдена од паб во Ислингтон.
Препорачано
-
1
-
2
-
3
Инструментот, кој му припаѓа на член на Лондонскиот филхармониски оркестар, наводно исчезнал од пабот „Маркез таверн“ на улицата Канонбери на 18 февруари. 30-годишната жртва ја пријавила кражбата истата вечер, соопшти полицијата, пренесува „Гардијан“.
Полицаецот Мајкл Колинс од полициската станица Камден изјави дека полицијата ќе објави снимки од безбедносните камери за да се обиде да го идентификува осомничениот. „Вложивме многу труд за да го пронајдеме осомничениот и го објавуваме ова видео со надеж дека ќе ни помогне да го идентификуваме што е можно поскоро“, рече тој.
Жртвата на грабежот ѝ кажала на полицијата дека инструментот вреди повеќе од 175.000 евра и е направен во Фиренца во 1740 година. „Неверојатно е вреден, а за жртвата, непроценлив. Ве молиме помогнете ни да го пронајдеме лицето одговорно за оваа кражба и да ја вратиме виолината на нејзиниот вистински сопственик“, додаде тој.
Претходно беше објавено дека Давид Лопез Ибањез, од Филхармонискиот оркестар, вечерал со пријател кога виолината исчезнала од негова страна. Му ја позајмил германски бизнисмен кој сакал да му помогне во кариерата.
