Под музејот на современа уметност, во сенките на Кале се крие куќа – музеј, која со текот на годините стана урнатина. Првично е направена да биде културен центар и место за хуманитарни настани. „Слободен печат“ со видеоприлог се потруди да ви ја донесе реалната состојба на „музејот“ кој после смртта на Есма Реџепова и нејзиниот сопруг Стево Теодосиевски и поради бројните семејни недоразбирања и неодржување е оставен под надлежност на државата.

Музејот првично требало да се гради на Водно, но, поради поделбата на граѓаните според етничка припадност, со големи маки и напор започнал да се гради на Скопското кале.

По смртта на нејзиниот сопруг Стево, на Реџепова ѝостанале многу долгови. Таа решила да земе кредит и да го доврши. Но, музејот за жал, е во уште полоша состојба.

Се упативме кон дворот. На влезот имаше голем душек фрлен на земја, распространети работи од нивниот дом, а од прозорецот рефлектираше дрвениот крст од погребот на Стево, потпрен на ѕидот. Во другите простории беа украдени персонални работи, санитарии, а дипломите и сликите на Есма и Стево беа расфрлани насекаде.

Тоа што на „крадците“ им изгледало безвредно се нивните портрети на ѕидот и нејзината скулптура која стои среде собата.

Проследете ја целата видеорепортажа и откријте ги личните приказни и патешествија на нејзиниот посвоен син Симеон Атанасов.