Кое е вашето омилено животно од Зоолошката градина – Скопје? Дали знаете како се вика, колку години има, од која земја потекнува и кога за прв пат бил донесен тој вид, таа единка кај нас? Нашата Зоолошка постои од 1926 година и низ годините се развивала просторно, а растел и бројот на животните. Денес при посетата на Зоолошката градина можете да се запознаете со стотици разновидни единки, а секоја од нив крие посебна судбина.
„Слободен печат“, низ овој серијал, кој го нарековме „Лична карта на жителите на ЗОО Скопје“, ќе се обиде да ви ги доближи нивните приказни, нивните карактери и чувства. Ќе се обидеме да ви овозможиме да дознаете што јадат и која е нивната омилена храна, ќе дознаете нешто ново и забавно, поврзано со омилените сожители во главниот град.

ВИДЕОИНТЕРВЈУ | Кристина и Ганчо – крокодилите од Зоолошка за десерт јадат дудинки

Од 12 пингвини кои живеат во Зоолошката во Скопје секој е со своја приказна, карактер, однесување, па така и си ги добиле имињата од вработените, кои навистина биле креативни. Лила е пингвин-инфлуенсерка, раскажува за „Слободен печат“ харизматичната ЗОО-негувателка Маја Дојчиновска, која вели дека оваа пингвинка се прави многу важна. Кога Лила станала мајка, не се грижела доволно за пингвинчињата, туку тоа му го препуштила на таткото Џонатан, а таа си се грижела за себе.

– Имаме еден пингвин кој го викаме Драчево. Тој нема манири, кога јаде сè расфрла на сите страни, ги плука другите, па така на шега го завикавме Драчево. Немаме ништо против колегите од Драчево, не сакаме никој да се навреди, напротив, тоа е само за забава – вели Дојчиновска.

Нејзиниот миленик е пингвинот Монти, кого таа го опиша како вистински господин. Точно знае што сака, јаде на посебен начин, чека да биде специјално викнат.

Интересна е и приказната за тоа како пингвинот Зоки го добил своето име.

– Тоа беше периодот кога се случија нередите во Собранието. Следниот ден кога дојдовме на работа, што да видиме, Зоки се истепал со сите и тој заврши со дупната крвава глава. Така симболично дојде и неговото име – вели таа.

Секој поминат ден со пингвините е различен, забавен, но и напорен. Периодот кога се чекаат да се испилат мали пингвинчиња е тежок за ЗОО-негувателите. 

– Ние многу се радуваме кога треба да дојдат малите, но кога ќе ни текне колкава мака е за нас тоа, сфаќаме дека и не е така забавно. Кај пингвините е потребна голема помош од нас околу малите и има многу работа – вели Дојчиновска.

Целото видео за пингвините погледнете го во продолжение:

ВИДЕОИНТЕРВЈУ | Кристина и Ганчо – крокодилите од Зоолошка за десерт јадат дудинки