Во денешно време купувањето на секнд хенд облека станува сè попопуларно. Овој тренд не само што помага да ја заштитиме животната средина, туку и нуди уникатни парчиња облека по пристапни цени. Ина Михајлова – дизајнерка од Скопје која со својата приказна е доказ дека дизајнот и уметноста можат да се искористат како моќни алатки за промена.

Михајлова е дипломиран дизајнер со богато искуство во графичкиот дизајн. Работела со големи проекти, но и со детски работилници. Како уметник што го користи графичкиот и модниот дизајн, нејзиниот пат ја води кон нешто сосема различно. Решила да ги прошири своите интереси и да се посвети на нешто што е и корисно и еколошки одговорно – облеката од втора рака или секнд хенд облека.

-Од малечка знаев дека ќе се занимавам со уметност. Мојата љубов за креативноста никогаш не згаснала – вели Михајлова за „Слободен печат“.

Ина е сопственичка на онлајн продавница за секнд хенд облека, нешто што станало уште еден израз на нејзината креативност и одговорност кон животната средина, нудејќи внимателно одбрани парчиња облека што добиваат нова шанса.

– Секнд хенд облеката не е само заштеда, туку е и начин да придонесеме за заштита на животната средина. Даваме нов живот на предметите што веќе постојат – вели Ина.

Мотивирана од своите патувања низ светот и искуства, тоа ја инспирирало да ја донесе оваа традиција и култура на пазарување на секдн хенд облека и креирање базари во Скопје.

Исто така, Ина ја истакнува важноста на стигмата кон секнд хенд облеката.

– Мене ме мотивираат лица што ја имаат надминато онаа бариера на срам и престиж. Мислам дека е сосема во ред да се дозволи нешто што е во одлична или во солидна состојба да циркулира. На тој начин, свесно, можеби и несвесно, придонесуваме за животната средина – додава Ина.

Михаjлова има желба да продолжи да го шири својот бизнис на глобално ниво.