Првиот трејлер ги носи деталите од филмската адаптација на еден од најголемите поп гиганти на сите времиња, чиј автор е креаторот на повеќекратниот оскаровец „Bohemian Rhapsody“.

„How Will I Know“, „I Wanna Dance With Somebody“, „I Will Always Love You“ – навистина е тешко да се издвојат, а камоли да се набројат сите хитови на една од најголемите поп диви на сите времиња, Витни Хјустон. Доказ за тоа е Гинисовиот рекорд за најнаградувана жена уметник на сите времиња со повеќе од 400 награди, вклучувајќи и 6 Греми награди.

Возбудливата и енергична приказна за животот и кариерата на Хјустон ќе можеме да ја видиме во филмот „I Wanna Dance With Somebody: The Movie about Whitney Houston“, за кој е објавен првиот трејлер.

Трејлерот ги прикажува почетоците на нејзината соработка со музичкиот продуцент Клајв Дејвис, како и најнезаборавните моменти и концерти од нејзиниот живот и кариера. Црешата на шлагот на тортата беше спектакуларната изведба на Витни на американската национална химна на „Super Bowl XXV“ во 1991 година пред повеќе од 70.000 гледачи.

Во оваа биографска драма главната ѕведа ја отелотвори Наоми Аки, Стенли Тучи го игра музичкиот продуцент Клајв Дејвис, а Тамара Туни е во улогата на мајката на Витни, Сиси. Меѓу другите улоги се Кларк Питерс, Нафиса Вилијамс и Ештон Сандерс.

Режисер на филмот е Каси Лемонс која стои и зад филмовите „Hariet“, „Eve`s Bayou“, „Talk to Me“, додека сценариото го напиша Ентони Мекартен, четири пати номиниран за Оскар и сценарист на филмот „Bohemian Rhapsody“.

Овој филм е многу повеќе од едноставна биографија бидејќи низ радост и емоции го слави животот и музиката на една од најголемите поп диви на сите времиња. Речиси е сигурно дека ова биографско и музичко патување ќе биде вистинско уживање да се гледа во празнично расположение, со оглед на тоа што филмот ќе почне да се прикажува во сите кина во кон крајот на годината.