Археолози во северна Данска пронајдоа траги од потопени крајбрежни населби стари повеќе од 8.500 години, кои исчезнале поради порастот на нивото на морето, пишува „Асошиејтед прес“.

Откритието е дел од меѓународен проект финансиран од Европската унија, кој се фокусира на мапирање на морското дно во Балтичкото и Северното Море.

Оваа година нуркачи се спуштија осум метри под површината на морето во близина на Орхус, вториот најголем град во Данска, за да соберат докази за мезолитско населување. Проектот е дел од шестгодишен план вреден 13,2 милиони евра, во кој учествуваат истражувачи од Данска, Велика Британија и Германија.

Целта е да се идентификуваат потопени предели на Северна Европа и да се пронајдат изгубени населби од каменото доба, особено во услови на ширење на офшор ветерни електрани и друга морска инфраструктура.

Археологот Петер Мо Аструп, кој ги води ископувањата, вели дека досега најголем дел од доказите за овие населби биле пронајдени во внатрешноста, далеку од денешните крајбрежја. По завршувањето на последното ледено доба, топењето на мразот предизвикало глобален пораст на нивото на морето. За еден век нивото пораснало за околу два метра, што довело до потопување на населените места и присилна миграција на ловците и собирачите кон внатрешноста.

Раните наоди во Орхускиот Залив се сметаат за „временски капсули“, затоа што се сочувани во средина без кислород. Ова овозможило извонредно зачувување на дрвја и други материјали од тоа време.

Експертите предупредуваат дека нивото на морето денес расте побрзо од кога било. До 2023 година просечното зголемување изнесува 4,3 сантиметри по деценија, што повторно отвора прашања за иднината на современите крајбрежни градови.