Зак Ефрон во понеделникот доби ѕвезда на Булеварот на славните во Холивуд. За време на церемонијата тој се потсети на Метју Пери, со кого глумеле заедно во филмот „Повторно 17“ од 2009 година, пишува „Њујорк пост“.

Тоа беше еден од првите филмови на Ефрон покрај „Срденошколски мјузикл“ на Дизни.

„Сакам да споменам некој што не е овде денес, а тоа е Метју Пери, кој беше толку љубезен и дарежлив со мене кога работевме на ‘Повторно 17’“, изјавил Ефрон за време на церемонијата.

„Соработката со него – беше многу забавна и навистина ме поттикна и ме мотивираше на толку многу начини. Навистина ме турна во следното поглавје од мојата кариера и за тоа, многу ти благодарам, Метју. Денеска многу размислувам за тебе“, изјавил Ефрон, гледајќи нагоре кон небото.

Ефрон е 2.767-та ѕвезда што е додадена на Булеварот на славните во Холивуд, според официјалното соопштение за печатот.

За време на својот говор актерот зборувал и за тоа колку долго е во шоу-бизнисот.

„Глумам, пеам и танцувам онолку долго колку што се сеќавам, но никогаш, ни во моите најлуди соништа не можев да замислил дека ќе стојам овде денес“, изјавил Ефрон.

Режисерот на „Железната канџа“ Шон Дуркин и колегите на Ефрон, Мајлс Телер и Џереми Ален Вајт присуствуваа на церемонијата во понеделникот и одржаа свои говори на настанот.

„За нашата генерација, Зак беше и е првата вистинска суперѕвезда што излезе од нашата класа“, рекол Телер на церемонијата.