Македонскиот претставник на Евросонгот Васил Гарванлиев заедно со тимот на МРТ, носител на лиценцата за овој избор, во петокот пристигна во Ротердам, Холандија.

Гарванлиев веќе вчера ја имаше првата проба, а звуците на песната „Here I stand“ одекнаа на грандиозната евровизиска сцена во арената „Ахој“.

Според реакциите на присутните и коментарите на официјалниот евровизиски сајт настапот бил одличен. Македонскиот претставник доби позитивни критики од љубителите на Евровизија на социјалните мрежи, а има и пофалби за стајлингот, креација на модниот дизајнер Раде Василев.

Како што напиша Гарванлиев на социјалните мрежи, тој е возбуден и благодарен на коментарите на бројните фанови ширум Европа.

Евровизиската песна „Here I stand“ ја напиша самиот Гарванлиев.

Евросонгот ќе се одржи од 18 до 22 мај, во две полуфинални вечери и големото финале, а Гарванлиев ќе настапува во првото полуфинале, 6-ти по ред.